香港好多人連搵間屋住都有困難，但有人就因為擁有太多土地而煩惱。眾所周知，鄉議局已故前主席劉皇發(發叔)擁有大量新界土地，早年出任行政會議及立法會等公職時，都話啲土地多到漏報都唔奇，依家到佢個仔劉業強(發仔)接棒，一樣有申報土地嘅煩惱，究竟點樣可以防止漏報利益呢？原來發仔製作咗一個圖表來記錄土地資料。
新界人多土地都唔係出奇事，但係做得公職人員，就要做足申報及在適當時候避席，否則隨時被人質疑有利益衝突，尤其是不少公職都涉及土地政策，如果冇做好申報，隨時會被質疑係咪想早着先機獲利。當年發叔嘅土地遍布新界各區，佢擔任行會成員後，申報物業及土地數目一度超過700項，曾經有人追問有關土地位置，但發叔都話講唔清楚。
有一些鮮為人知的事，據講因為發叔太多新界土地，所以要聘請專人駕車去視察土地，包括檢視土地有冇被人侵佔，以及檢查土地外圍的鐵絲圍網有冇損壞等，若要視察所有土地，需時足足一個月。土地多，牽涉爭議亦多，發叔都曾經涉嫌漏報買樓利益及「摸貨」圖利，因而掀起政治危機，但事後佢都一一拆解，夠晒滋油淡定。
至今同樣持有大量土地的發仔劉業強，早前亦成為行會新貴，原來佢喺申報方面都已經做定準備，似乎係為免再捲入同類爭議。發仔話，開會時只能籠統咁申報有大量土地，佢都會盡量小心啲，但承認有難度，有啲兄弟姊妹持有嘅土地，佢都可能唔知道，仲有「我都唔知老竇有啲咩地」。
發仔又話，現時手上部分土地係爸爸畀佢嘅，以前經爸爸手，爸爸就記得晒，但係佢就未必知，不過佢都做咗個圖表，記錄自己有咩土地㗎喇！嘩，啲土地多到有個圖表，真係唔係常人會發生嘅事，所以話呢，香港點會唔夠土地呀？
本文來源：http://hk.on.cc/hk/bkn/cnt/news/20171028/bkn-20171028222620199-1028_00822_001.html
228
